– Сайн дурын даатгал гэдэг нь ажил хөдөлмөр эрхэлдэг албан журмын даатгалд хамрагдаггүй хөдөлмөрийн насны иргэн нийгмийн даатгалд сайн дураараа даатгуулахыг хэлдэг. 0-3 насны хүүхэдтэй эхүүд ч мөн адил албан журмын даатгалд хамрагддаггүй бол энэ даатгалд сайн дураараа хамрагдах боломжтой.

Сайн дурын даатгалд хамрагдах даатгуулагч өөрөө орлогоо тодорхойлдог. Өөрөөр хэлбэл 420,000- 4,200,000 төгрөгийн хооронд орлогоо тодорхойлж төлөх боломжтой. Энгийн сайн дурын даатгуулагчийн шимтгэлийн хувь нь 13,5%, харин 0-3 насны хүүхэдтэй эхийн сайн дурын даатгалын шимтгэл нь 12,5% юм. Жишээлбэл хөдөлмөрийн хөлсний хамгийн доод хэмжээ болох 420,000 төгрөгөөр төлөх бол түүний 12,5 хувь болох 52500 төгрөгийн шимтгэл төлнө.

0-3 насны хүүхдээ асран хамгаалдаг эхчүүд сайн дурын даатгалд хамрагдсанаар өөрт нь ямар боломж үүсэх вэ?

– 0-3 насны хүүхдээ асарч буй ээжүүд өөрөө 50%-ийн шимтгэл болох 26250 төгрөгийг төлсөн тохиолдолд үлдсэн 50%-ийг улсын төсвөөс болон даатгалаас төлүүлэх боломжтойгоороо давуу талтай байгаа юм. Тодруулбал сайн дурын даатгуулагч эх 420,000 төгрөгөөр орлогоо тогтоосон бол түүний 12,5 хувь болох 52500 төгрөгийн 50% буюу 26250 төгрөгийг эх өөрөө төлнө. Харин үлдсэн 26250 төгрөгийг улсын төсвөөс төлөх юм. Хүүхдээ 3 нас хүртэлх хугацаанд 50% -ийн шимтгэлээ өөрөө төлж хамрагдана гэсэн үг. Энэ хуулийн боломжид 0-3 насны хүүхэдтэй эхчүүд бүрэн хамрагдаасай гэж хүсдэг.

0-3 насны хүүхэдтэй ээж орлогоо өөрөө тодорхойлно. Даатгуулагч эхийн төлсөн шимтгэлийн 12,5 хувь тэтгэврийн даатгал болон тэтгэмжийн даатгалын санд хуваарилагдана. Тийм учраас сайн дурын даатгуулагч эх энэ сангуудаас үр ашгийг хүртэнэ гэсэн үг.

0-3 насны хүүхэдтэй ээжүүд сайн дурын даатгалд хамрагдахын тулд ямар бичиг баримт бүрдүүлэх вэ? Хэрхэн хамрагдах вэ?

– Өөрийн иргэний үнэмлэх, мөн хүүхдийнхээ төрсөний гэрчилгээтэй оршин суугаа газрынхаа хэлтэст биечлэн очиж гэрээ хийнэ.

Энэ бүртгэл нь цахимаар байх боломжтой юу?

– Байж болно. Цахим хуудсаар, мөн Архангай аймгийн нийгмийн даатгалын хэлтсийн 75079000 утсаар холбогдох боломжтой. Мөн сумын байцаагч нартай утсаар холбогдож болно.

Энэ төрлийн даатгалаа яаж төлөх вэ? Төлөлт хийхдээ юуг анхаарах ёстой вэ?

– Интернэт банк, нийгмийн даатгалын аппликейшн, даатгуулагчийн вэб зэргийг ашиглаад сайн дурын даатгалын дансруугаа шимтгэлээ төлөх боломжтой. Нийгмийн даатгалын дэвтэр цахимжсан учир даатгалын аппликейшн ашиглан сар бүрийн төлөлтөө хянаад явах бүрэн боломжтой.

Мөн иргэд даатгалаа төлөхдөө данс андуурах тохиолдол цөөнгүй бий. Сум болгоны сайн дурын даатгалын данс өөр өөр байдаг. Анх хаана бүртгүүлж, гэрээ байгуулсан тэр орон нутгийнхаа дансанд шимтгэлээ шилжүүлнэ гэдгийг анхаарах хэрэгтэй.

3 хүртэлх насны хүүхэдтэй эхийн сайн дурын даатгалд хамрагдаж байгаа ээжүүд ихэвчлэн ямар асуулт асуудаг вэ?

– Ээжүүд сайн дурын даатгал төлсөнөөр цалинтай ээжийн 50,000 төгрөгт давхар хамрагдахгүй гэж ойлгодог. Энэ талаар их асуудаг. Сайн дурын даатгал, цалинтай ээж гэдэг нь хоёр тусдаа ойлголт шүү дээ. Тийм учраас даатгалаа төлөөд, цалинтай ээжийн тэтгэмжээ ч авна.