2022 оны 1-р сараас эхлэн эмнэлгийн хуудас цахимжсан. Эмнэлгийн хуудасыг жирэмсэн амаржсаны болон хөдөлмөрийн чадвараа түр алдсаны гэж хоёр янзаар олгодог.
Эхэн үед аймгийн Нэгдсэн эмнэлэг эмнэлгийн хуудсаа цахимаар илгээж эхэлсэн. Харин сум өрхийн эмнэлгүүд хожуу цахим системд орсон. Одоо бол бүх эмнэлэг цахимжиж жигдэрсэн байна. Иргэд лист гэж ярьж хэвшсэн байдаг шүү дээ. Энэ нь цахимд шилжиж байна гэсэн үг.
Сүүлийн үед цахимаар эмнэлгийн хуудсаа илгээхтэй холбоотой ямар асуудал гарч байна вэ?
Иргэд хуулийн хугацаандаа хүсэлтээ илгээхгүй байгаа тохиолдол гарч байна. Жирэмсэн үедээ эсвэл төрсөнийхөө дараа даатгуулагч эмнэлгийн хуудас авдаг. Тодруулбал жирэмсэн амаржсаны эмнэлгийн хуудасны хүсэлтээ илгээх гэж байгаа даатгуулагч эх төрсөнийхөө дараа 30 хоногийн дотор илгээх ёстой байдаг. Түүнчлэн эх хүсэлтээ илгээхээс өмнө тухайн эхийн төрсөн эмнэлгээс эхрүү эмнэлгийн хуудасны хүсэлтийг илгээх ёстой. Түүний дараа нь эх өөрөө нийгмийн даатгалын байгууллагад илгээх ёстойг анхаарах хэрэгтэй.
Харин хөдөлмөрийн чадвараа түр алдсан иргэн эмнэлэгт хэвтэн эмчлүүлээд гарсанаас хойш тав хоногийн дотор хүсэлтээ илгээх ёстой. Энэ хугацаанд амжиж илгээгүйгээс тэтгэмжээ авахгүй байгаа тохиолдол их байна.
Сайн дурын даатгуулагч хүсэлт илгээхэд юуг анхаарах ёстой вэ?
Хамгийн эхэнд хуулийн хугацаа. Сайн дурын даатгал, албан журмын даатгал төлдөгөөрөө зарим зүйлс өөр байгаа. Сайн дурын даатгуулагч төлдөг хөдөлмөрийн чадвараа түр алдсан иргэн мөн адил. Түүнийг эмчилсэн эмч нь эмнэлгээс эмнэлгийн хуудсын хүсэлт илгээнэ. Мөн иргэн өөрөө хүсэлтээ давхар илгээнэ. Ингэж тэр хүний эрх үүсч, тэтгэмж олгогдоно.
Харин тодорхой албан байгууллагад ажилладаг. Албан журмын даатгал төлдөг иргэн хөдөлмөрийн чадвараа түр алдсан бол тухайн хэвтэн эмчлүүлсэн эмнэлгээс хүсэлтийг нь байгууллагад нь илгээнэ. Байгууллагын нягтлан нь тухайн ажилтны ажилгүйдлийн тэтгэмж авах хугацаанд бодолт хийж түүнийгээ хоёр хувилж өгнө. Харин иргэн байгууллагын дарга болон нягтлангын гарын үсгийг зуруулж нийгмийн даатгалын хэлтэст авчирдаг. Бид тэрийг нь хянаж бодолт хийгээд байгууллагынх нь дансруу явуулдаг.
Хүсэлт илгээх хооронд хугацаа алддаг уу?
Тухайн иргэн эсвэл эмнэлгээс хүсэлт илгээлээ гэхэд тэр дороо программд орчихдог ямар нэгэн хүлээлт үүсдэггүй.
Одоогоор голчлон гараад байгаа асуудал бол хуулийн хугцааандаа хүсэлтээ илгээхгүй байгаа байдал юм. Тухайн жирэмсэн эмэгтэйг төрүүлсэн эмч нь өөрөө хүсэлтийг илгээчихдэг. Гэсэн ч эх өөрөө илгээдэггүй. Тэгээд тэтгэмжээ авч чадахгүй байдал үүсдэг. Эх, эмч хоёр хоёулаа илгээж байж эрх нь үүсдэг гэдгийг анхаарах хэрэгтэй.
Иргэд эмнэлгийн хуудасны хүсэлтээ илгээхдээ даатгуулагчдад зориулсан вэб, мөн И монголиа аппликейшнаар дангаар нэвтрэх хэсгээр орж хүсэлтээ илгээж болно.
